ಮೆಲ್ವಿನ್ ರೊಡ್ರಿಗಸ್ - ಕವಿತಾ 16

ತಾನ್ ಬಾಗ್ತಾನಾ

ಪಾಲಂವ್ ಖಾಂದಾರ್ ಧಲ್ತಾನಾ
ವಾರ್‍ಯಾಕ್ ಸಕ್ಲಾ ಪಡ್ತಾನಾ
ಆಶಾ ಚಡ್ತಾ ಮ್ಹಜೆ ಖಾಡ್ಕೆಚಿ
ತುಜ್ಯಾ ಭುಜಾಚಿ

ಮೋಗ್ ಉತ್ರಾಂನಿ ಆಸ್ತಾನಾ
ವೋಂಟ್ ತುಜೆ ಉಸಾತಾನಾ
ವಿಸರ್ ಪಡ್ತಾ ತುಜ್ಯಾ ಉತ್ರಾಂಚಿ
ಖಂತ್ ವೊಂಟಾಂಚಿ

ಮಾತೆಂ ಸುರ್ಯಾಕ್ ಚಿಂವ್ತಾನಾ
ರಂಗಾಳ್ ರಂಗಾನ್ ರಂಗ್ತಾನಾ
ಯಾದ್ ಕಿತ್ಯಾಕ್ ಮ್ಹಜ್ಯಾ ಘರಾಚಿ
ತಾನ್ ಕೆಸಾಂಚಿ

ಮಿರಿಯಾಂನಿ ಸಾಡಿ ನೆಟ್ತಾನಾ
ಸಾಳೊಕ್ ಫುಲ್ತಾ ಚಲ್ತಾನಾ
ಉಡಿ ಚಡ್ತಾ ಮ್ಹಜೆ ತಕ್ಲೆಚಿ
ಆಶಾ ಉಸ್ಕ್ತ್ಯಾಚಿ

ಅತ್ರೆಗ್ ಮ್ಹಜೆ ಜಿರ್‍ತಾನಾ
ನವ್ಯಾಂಕ್ ಆಶೆವ್ನ್ ಧಾಂವ್ತಾನಾ
ಝರ್ ವ್ಹಾಳ್ತಾ ತುಜ್ಯಾ ದುಖಾಂಚಿ
ಮ್ಹಜ್ಯಾ ಮೊಡಾಂಚಿ

1985